O que te ocultan da privatización da sanidade, que non te enganen

Contra a privatización, a mellor vaccina: derrogación da Lei 15/97 e do artigo 90 da lei xeral de sanidade.

«Durante décadas, os gobernos apenas financiaron nin dotaron de persoal suficiente e privatizaron os sistemas de saúde en todo o mundo. E estas tendencias agravaron o impacto da pandemia»¹.

Por todo o Estado estamos asistindo a unha serie de mobilizacións e performances dirixidas exclusivamente contra os partidos de dereitas que están privatizando a sanidade, pero te están ocultando o principal

Por que ocorre isto? Por que poden privatizar a sanidade?

A privatización é legal segundo dúas leis de ámbito estatal: os artigos 67 e 90 da Lei Xeral de Sanidade, que permiten derivar aos pacientes á privada mediante concertos e convenios singulares; e a lei 15/97, que permite que un centro público pase a ser xestionado por empresas privadas por décadas.

Quen aprobou e/ou mantén estas leis?

Todos os partidos políticos do arco parlamentario aprobaron, ou defenden manter as devanditas leis.

Que garantías hai de que se cambian os gobernos non privatizarán?

Ningunha. Cando as “esquerdas” están na oposición prometen derrogalas, pero cando chegan ao poder, esquecen as súas promesas:

• En 2009 presentamos 500.000 sinaturas no Congreso pedindo que derrogase a lei 15/97, cando o PSOE tiña maioría para derrogala, e nin sequera tiveron a decencia de recibirnos.
• Pero no 2012, xa na oposición, o PSOE presentou unha proposición non de lei para derrogar a 15/97 —o PP tiña maioría absoluta e era imposible que fose adiante.
• Unidas Podemos defendeu derrogar a 15/97 até 2015, cando estaba na oposición. Incluso Irene Montero participou connosco nas mobilizacións pola derrogación naquela época. Hoxe garda silencio.

É posible blindar a sanidade nunha soa comunidade autónoma?

Non. Todas as leis de ordenación sanitaria autonómicas son subsidiarias das leis estatais (Lei Xeral de Sanidade e Lei 15/97), e introduciron tamén a xestión privada nos seus territorios. Só a derrogación das estatais permitirá blindar a sanidade en todas as autonomías.

Por que estamos en contra da sanidade privada?

Os hospitais privados teñen maior mortalidade. A evidencia científica amosa que a mortalidade se incrementa ao ser atendido nun hospital con ánimo de lucro: un 9,5% en neonatos, un 2% en adultos² e un 8% en crónicos³. Isto é así porque os hospitais privados empregan menos persoal, recortan gastos de hospitalización e reducen as estadías dos pacientes… para repartir beneficios entre os seus accionistas (os inversores esperan un 10%-15% de retorno do seu investimento).

Que se pode facer?

Explicar que a privatización é legal, e que detrás dela se agocha o transvasamento de miles de millóns de euros, todos os anos, a empresas privadas, o que levou ao colapso o sistema público. A única posibilidade é a mobilización na rúa contra todos os partidos políticos que defendan a xestión e o lucro privados da sanidade.

Que alternativas hai?

Incluso cos cartos que actualmente se dedican á sanidade é posible un sistema sanitario público que atenda a toda a poboación, independentemente da súa situación administrativa, con xestión democrática, que actúe contra os determinantes sociais e económicos da doenza, e non soamente centrada no curativo e o hospitalcentrismo.

Isto implica:

• Reforzar o sistema sanitario con máis cadros de persoal, utilizar todos os recursos existentes, ampliando a xornada ordinaria dos hospitais polas tardes.
• Potenciar a atención primaria e a saúde pública.
• Prohibir o ánimo de lucro no sistema sanitario, derrogando as leis privatizadoras.
• Acabar coas redes sanitarias paralelas que se nutren do diñeiro público.

27 de febreiro 2021, mobilizacións estatais.

Referencias

1. Lo que salió mal. El coronavirus y el mundo después de la parada completa. Carlo Caduff, King’s College de Londres.
2. A systematic review and meta-analysis of studies comparing mortality rates of private for-profit and private not-for-profit hospitals. https://www.cmaj.ca/content/166/11/1399.
3. Estudio: Comparación de la tasa de mortalidad entre centros de hemodiálisis lucrativos y no lucrativos: una revisión sistemática y meta-análisis. https://www.casmadrid.org/docStatic/dialisis_mortalidad.pdf